_LOTEK UBAR LIEUR_

27 Mei jam 23:36

ki Ihan hiji poe dititah meuli lotek ,ku dununganna. kaparengan ampir kabeh pagawe nu lain naritah meuli lotek.

“ki, meuli lotekna sabaraha bungkus ?” tanya tukang lotek

“Sapuluh bungkus bi, nu kahiji tandaan make karet beureum, cengekna hiji, ulah amis teuing, make sangu satengah, anu kadua tandaan make karet koneng, kade nu ieu mah resep lada cengekna sapuluh, make lontong, kurupukna pisahkeun, anu katilu tandaan make karet dua, cengekna tilu, sing medok, tong dijeruk nipisan, sanguna hiji
satengah, kurupukna dua, anu kaopat ieu mah jeung sekertaris bos, tandaan karet dua tapi meungkeutna silangkeun, tong make paria, kade da keur nyiram jeruk nipisna sing loba, ladana sedeng, rada amis amis aseum, lontongna lima siki, anu kalima,saha nya, aeh enya jang si Miun cengekna lima, sanguna galokeun……….!”

” Heup…heup….heup… ulah diteruskeun , jangar ibi karasa deui !” ceuk tukang lotek bari nyangsaya dihandapeun meja daganganana, kadua leungeunna nyekelan tarangna,bari gogodeg...

” Har ari ibi, kumaha ieu teh ?”

” Heueuh sok we ngaladangan sorangan, ibi mah teu kuat jangar !”
ki Ihan rarat reret, pamikirna sugan aya tukang lotek salian ti eta anu deukeut, kaparengan deuih suwung. Atuh kapaksa ki Ihan nyieun lotek sorangan, da lamun teu ditedunan mah pisakumahaeun ngambekna
dunungan, bisa bisa dipecat gawe na. Keur ngarendos teh tarangna kerung mikiran samara anu dipake, katambah deui nginget nginget deui naon anu dipesen tadi. Keur
anteng nyieun lotek solongkrong aya nu nyampeurkeun, pok ngomong.
” mang meser lotek tujuh bungkus,nu kahiji tandaan make karet beureum, cengekna hiji, ulah amis teuing, make sangu
satengah, anu kadua tandaan make karet koneng, kade nu ieu mah resep lada cengekna sapuluh, make lontong, kurupukna
pisahkeun, anu katilu tandaan make karet dua, cengekna tilu, sing medok, tong dijeruk nipisan, sanguna hiji satengah, kurupukna
dua…….!”

” Gustiiiiiiiiiiii……..!”
Ki Ihan aral, teu karasa belewer rerendos anu keur dicekel teh dibalangkeun, belentrang kana tarang tukang lotek nu keur nyangsaya...